Amasomo ku wa Gatanu XXIX, A

ISOMO RYA MBERE


Ibaruwa Mutagatifu Pawulo Intumwa yandikiye Abanyaroma    (Rom 7, 18-25a)

Bavandimwe, 18nzi neza ko icyiza kitandimo kubera intege nke z’umubiri wanjye. Nshobora kwifuza icyiza, ariko kugikora bikananira. 19Kuko icyiza nifuza ntagikora, naho ikibi ndashaka akaba ari cyo nkora. 20Niba rero icyo ndashaka ari cyo nkora, ntibikibaye jyewe ugikora ahubwo ni icyaha gituye muri jye. 21Jyewe ushaka gukora icyiza, nsanga hari iri tegeko ko ikibi ari cyo kimbangukira. 22Nishimira amategeko y’Imana mu mutima wanjye, 23nyamara nkabona irindi tegeko muri jyewe rirwanya itegeko ry’umutima wanjye, ku buryo ndi imbohe y’itegeko ry’icyaha rindimo. 24Mbega ngo ndaba umunyabyago ! Ni nde uzankiza uyu mubiri wagenewe gupfa ? 25aImana ishimwe muri Yezu Kristu Umwami wacu !

 

ZABURI     (Zab 119 (118), 66.68, 76-77, 93-94)

 

Inyik/ Mana yanjye, unyigishe ugushaka kwawe.

 

Unyigishe ibyiza by’ubushishozi n’ubumenyi,

kuko niringiye amatangazo yawe.

Uri umugwaneza n’umugiraneza,

unyigishe ugushaka kwawe.

 

Urukundo rwawe ni rwo rwampoza,

Nk’uko wabisezeranije umugaragu wawe.

Impuhwe zawe nizincengere maze mbeho,

kuko amategeko yawe antera ubwuzu.

 

Sinzigera nibagirwa amabwiriza yawe,

kuko ari yo untungishije.

Ndi uwawe unyirokorere,

kuko ndangamiye amabwiriza yawe.

 

IBANGONDIRIMBO RIBANZIRIZA IVANJILI    (Mt 11, 25)

 

Alleluya Alleluya.

Uragasingizwa Dawe, Mutegetsi w’ijuru n’isi,

kuko wahishuriye abaciye bugufi amabanga y’Ingoma y’ijuru.

Alleluya.

 

IVANJILI


+ Luka   (Lk 12, 54-59) 

Muri icyo gihe, Yezu abwira rubanda ati 54« Iyo mubonye igicu giturutse iburengerazuba, muhita muvuga muti “Imvura iraza kugwa”, kandi bikaba. 55N’iyo mubonye umuyaga uhushye uturutse mu majyepfo, muravuga muti “Haraza kuba ubushyuhe, kandi bikaba. 56Mwa ndyarya mwe musobanukirwa n’ibyo mu nsi n’ibyo mu kirere, ni iki gituma mudasobanukirwa n’iby’iki gihe ? 57Kuki mutabona ubwanyu icyo mukwiye gukora ? 58Nuko rero, nujyana n’umuburanyi wawe agiye kukurega, gerageza kwigorora na we mukiri mu nzira hato ataguteza umucamanza, umucamanza na we akakugabiza umurinzi w’uburoko ngo agufunge. 59Ndabikubwiye: ntuzafungurwa utishyuye kugeza ku isenge rya nyuma.» 


24 Kanama 2014: Icyumweru cya 21 mu byumweru bisanzwe

         AMASOMO:
Iz 22, 19-23abr /> Rom 11, 33-36
 Mt 16, 13-20


«Wowe uri Kristu, Umwana w'Imana Nzima. »