ven.

07

oct.

2011

UBUTUMWA NYIRUBUTUNGANE PAPA BENEDIGITO WA CUMI NA BATANDATU YAGENEYE UMUNSI MPUZAMAHANGA W’IYOGEZABUTUMWA 2011

UBUTUMWA NYIRUBUTUNGANE PAPA BENEDIGITO WA CUMI NA BATANDATU YAGENEYE UMUNSI MPUZAMAHANGA W’IYOGEZABUTUMWA 2011

 

                             Ku wa 23 Ukwakira 2011

                              

Nk’uko Data yantumye, nanjye ndabatumye” (Yh 20, 21)

 

Igihe twizihizaga Yubile y’imyaka 2000, dutangiye ikinyagihumbi gishya  cy’ubukristu, Nyirubutungane Papa Yohani Pawulo wa Kabiri,  yashimangiye ko ari ngombwa kuvugurura uburyo bwo  kogeza Ivanjili hose « bigakoranwa umwete nk’uwaranze abakristu ba mbere » ( Ibaruwa  Novo millenio ineunte, 58). Ni umurimo w’ingirakamaro Kiliziya igeza ku bantu bose bashakashaka ukuri, kugira ngo bashobore kugera ku buzima nyabwo. Ni yo mpamvu duhora tuwushishikarizwa buri mwaka igihe twizihiza umunsi mpuzamahanga w’iyogezabutumwa. Koko rero, iyogezabutumwa rihoraho ryubaka Kiliziya, ubwitange bwayo n’umwete w’ubutumwa, rikanavugurura uburyo bwo kogeza Ivanjili kugira ngo burusheho kujyana n’ibihe tugezemo, bikeneye iyogezabutumwa rishya n’ishyaka ryo kwitangira Inkuru Nziza. « Ni byo koko, iyogezabutumwa rivugurura Kiliziya, rigakomeza ukwemera kwayo n’ibiyiranga, ribyutsa umwete n’imigambi mishya. Ukwemera kurushaho gukomera iyo kugezwa ku bandi!

Kwitangira umurimo w’iyogezabutumwa ni ryo shingiro ry’imigambi y’iyogezabutumwa rivugurura abakristu (Yohani Pawulo wa Kabiri, Redemptoris missio, 2).

 

Nimugende mwigishe

Ubu butumwa buhora bwibutswa buri gihe mu mihango ya liturujiya, by’umwihariko mu gitambo cy’Ukaristiya, gisozwa n’ubutumwa Yezu wazutse yahaye intumwa ze agira ati: « Nuko rero nimugende…» (Mt 28, 19). Liturujiya ihuza « abaturutse hirya no hino ku  isi »  kandi « ibohereza mu isi » kuba abahamya b’ibyo biboneye: ububasha bw’umukiro bakesha ijambo ry’Imana ritanga agakiza n’ububasha bukiza bukomoka ku iyobera rya Pasika ya Nyagasani . Abahuye na Nyagasani Yezu wazutse bose bumvise ko ari ngombwa kubimenyesha abandi nk’uko abigishwa babiri ba Emawusi babigenje. Bamaze kumenyera Nyagasani mu imanyura ry’umugati « ako kanya barahaguruka basubira i Yeruzalemu. Bahasanga ba Cumi n’umwe bateranye, bari kumwe na bagenzi babo bandi », babatekerereza uko byagenze mu nzira (Lk 24, 33-34). Papa Yohani Pawulo wa Kabiri yadushishikarije kuba maso kugira ngo  tumenye Yezu Kristu kandi tugeze Inkuru Nziza ye ku bandi: «Twabonye Nyagasani ! » (Ibaruwa Novo millenio ineunte, 59).     

 

Mwigishe amahanga yose

Amahanga yose agomba gushyikirizwa Inkuru Nziza.  Kiliziya « ibereyeho iyogezabutumwa kuko ubwayo ikomoka ku butumwa bwa Kristu no ku butumwa bwa Roho Mutagatifu, nk’uko byagenwe n’Imana Data » (Inama Nkuru ya Vatikani ya Kabiri, Ad Gentes, 2). Uko kwitangira iyogezabutumwa ni « ingabire n’inshingano bya Kiliziya, ni nabyo biyiranga ku buryo nyabwo. Kiliziya ni nacyo ibereyeho » (Pawulo wa Gatandatu, Ibaruwa Evangelii nuntiandi, 14).  Kubera iyo mpamvu igomba guhora yaguye amarembo. Ubutumwa bwayo burenga imbibi z’aho yubatse. Hakurikijwe  ijambo rya Yezu Kristu kandi bishingiye ku ngabire n’urukundo bye, umurimo wa Kiliziya ugera ku bantu bose ku buryo bwuzuye kugira ngo ubageze ku kwemera ( reba Ad gentes, 5).

 

Uwo murimo uhangayikisha Kiliziya buri gihe kuko ubutumwa Yezu Kristu yayishinze ntaho buragera. «…Turebye uko ibintu bimeze muri iki gihe, dusanga ubwo butumwa busa n’aho bugitangira; tugomba kubwitangira n’imbaraga zacu zose » (Yohani Pawulo wa Kabiri, Ibaruwa Redemptoris missio, 1). Ntidushobora gushyira umutima hamwe mu gihe nyuma y’imyaka 2000 hakiri abantu bataramenya Yezu Kristu kandi batarabwirwa Inkuru Nziza y’umukiro.

 

Hari benshi mu bakiriye Ivanjili bateye umugongo Kiliziya bakumva ko batakiri abayo, kandi umubare wabo ntuhwema kwiyongera.Na none kandi mu bihugu byinshi birimo ndetse n’ibyakiriye Ivanjili kera ubu basigaye batagishaka kuyoborwa n’amahame y’ubukristu.

Muri iki gihe hari impinduka nyinshi ku isi ziterwa n’ikusanyabukungu, imitekerereze inyuranye n’imyumvire idaha agaciro igikwiye, imyumvire n’imibereho yirengagiza Ivanjili nk’aho Imana itabaho. Ibyo bishora abantu mu gushyira imbere inyungu z’iby’isi, mu gukira batavunitse, mu kuba abacakara b’umurimo n’ibyubahiro nk’intego y’ubuzima bwabo kabone n’ubwo bakwirengagiza imigenzo myiza.

 

Iyogezabutumwa, inshingano ya buri wese

Kogeza Ivanjili ku isi bireba abantu bose, muri byose n’igihe cyose. Ivanjili si umwihariko w’abayakiriye gusa, ahubwo ni n’impano igomba kugezwa ku bandi, ni n’Inkuru Nziza igomba kwamamazwa. Iyo ngabire isaba kwitanga ntihabwa bamwe gusa ahubwo ihabwa ababatijwe bose bagize      « ubwoko bwatoranyijwe,…ihanga ritagatifu, umuryango Imana yironkeye » (1 Pet 2,9), kugira ngo bamamaze ibikorwa bye  by’agatangaza. 

 

Ibikorwa byose rero birakenewe mu iyogezabutumwa. Ubwitange n’ubufatanye mu iyogezabutumwa rya Kiliziya ntibikorwa rimwe na rimwe gusa, kandi ntibigomba gufatwa nka kimwe mu bikorwa bisanzwe by’iyogezabutumwa. Umurimo w’iyogezabutumwa wa Kiliziya ni ngombwa kandi ugomba guhoraho iteka. Umunsi w’iyogezabutumwa ubwawo si igihe cyitaruye ibindi bikorwa bya Kiliziya mu mwaka wose, ahubwo ni umwanya w’ingirakamaro ufasha abakristu kwicara no kwibaza kugira ngo bamenye ibikenewe n’ingamba bishobora kubafasha kwitangira umurimo w’ibanze ureba iyogezabutumwa  mu buzima bwa Kiliziya.

 

Dufatanye iyogezabutumwa muri rusange

Umurimo w’iyogezabutumwa ni urugendo rurerure rukenera ibintu byinshi binyuranye. Muri byo, igikorwa cyo gukangurira abantu iyogezabutumwa cyakomeje guha umwanya wihariye ubufatanye bw’abakristu. Iyo ni imwe mu ntego z’Umunsi mpuzamahanga w’iyogezabutumwa wifashisha Ibikorwa bya Papa byita ku Iyogezabutumwa mu gusaba inkunga ikenewe kugira ngo hitabweho imirimo yo kogeza Inkuru Nziza muri za Kiliziya zigishingwa. Ikigamijwe muri ibyo ni ugushyigikira inzego zikenewe mu gushinga no gukomeza Kiliziya hifashishijwe abakateshisite, amaseminari n’abapadiri; ikindi kandi kiba kigamijwe ni ugutanga inkunga iteza imbere imibereho myiza y’abantu cyane cyane mu bihugu byugarijwe ahanini n’ubukene, imirire mibi cyane cyane iy’abana, indwara, ibura ry’amavuriro n’iry’amashuri. Ibyo byose na byo biri mu butumwa bwa Kiliziya. Igihe yamamaza Ivanjili, iba ishishikajwe byimazeyo n’ubuzima bw’abantu.

Umugaragu w’Imana, Pawulo wa Gatandatu, yemeje ko mu kwamamaza Inkuru Nziza hadakwiye kwirengagizwa ingingo zirebana n’iterambere ry’abantu , ubutabera, kubohora abakandamizwa bose ariko hubahirizwa inzego za politiki. Kutita ku bibazo by’imibereho isanzwe y’abantu, byaba ari « ukwirengagiza inyigisho y’Ivanjili ku rukundo rwa mugenzi wacu ubabaye n’ukennye » ( Ibaruwa Evangelii nuntiandi, 31.34); koko ibyo ntibyaba bihuje n’imyitwarire ya Yezu we « wazengurukaga imijyi n’insisiro, yigisha mu masengero yabo, akwiza Inkuru Nziza y’Ingoma, ari na ko akiza icyitwa indwara n’ubumuga bwose »(Mt 9, 35).

 

Bityo, igihe umukristu afatanya n’abandi ubutumwa bwa Kiliziya, aba yubaka ubumwe, amahoro n’ubufatanye Kristu yadusigiye kandi agira uruhare mu gusohoza umugambi w’Imana wo gucungura abantu bose. Inzitizi abakristu bagomba kurenga zibasaba kugendana n’abandi, kandi iyogezabutumwa ni kimwe mu bintu bigize urwo rugendo bakorana n’abandi. N’ubwo dutwaye muri twe ubutumwa bwa gikristu mu tubindi tumeneka ubusa, ubwo butumwa bushingiye ku Ivanjili ni ikintu cy’agaciro katagira urugero, ni ubuhamya bugaragaza Yezu Kristu wapfuye akazuka, dusanga kandi twubaha muri Kiliziya.

 

Umunsi w’Iyogezabutumwa nuvugurure muri buri wese ubushake n’ibyishimo byo « gusanga » abantu bose ubashyiriye Kristu. Mu izina rye, mbahaye mbikuye ku mutima umugisha wa gitumwa, nzirikana by’umwihariko abavunika n’abababara cyane kubera Ivanjili.

 

Bikorewe i Vatikani, ku wa 6 Mutarama 2011,

Papa Benedigito wa Cumi na Batandatu

 

Byahinduwe mu kinyarwanda n’itsinda rya OPM-RWANDA


24 Kanama 2014: Icyumweru cya 21 mu byumweru bisanzwe

         AMASOMO:
Iz 22, 19-23abr /> Rom 11, 33-36
 Mt 16, 13-20


«Wowe uri Kristu, Umwana w'Imana Nzima. »