ven.

04

févr.

2011

UBUTUMWA BUGEWE URUBYIRUKO KU MUNSI NGARUKAMWAKA W’URUBYIRUKO KU RWEGO RW’IGIHUGU

UBUTUMWA BUGEWE URUBYIRUKO KU MUNSI NGARUKAMWAKA W’URUBYIRUKO KU RWEGO RW’IGIHUGU 

                                                       Kuwa 30 Mutarama 2011

     (Ubu butumwa nibwo Papa Benedigito wa XVI yageneye urubyiruko mu rwego rw’Umunsi Mpuzamahanga

                                       w’Urubyiruko ku nshuro ya XXVI  umwaka wa 2011 )

      Mushore imizi muri Kristu kandi mube ariwe mwishingikirizaho mukomejwe n’ukwemera 

                                                                    ( Reba Kol 2,7)

Rubyiruko nkunda,


Kenshi nongera gutekereza ku Munsi Mpuzamahanga w’Urubyiruko wabereye i Sidine mu w‘ 2008. Twagize umunsi mukuru ukomeye w’ukwemera, aho Roho w’Imana yakoresheje ububasha bwe, akaduha gusabana hagati y’abari baje muri uwo munsi, baturutse imihanda yose y’isi.


Iryo huriro, kimwe n’ayandi yaribanjirije ryeze imbuto nyinshi mu buzima bw’urubyiruko rwinshi n’ubwa Kiliziya yose. Ubu amaso tuyahanze Umunsi Mpuzamahanga w’Urubyiruko utaha uzabera i Madride muri Kanama 2011.


Mu w‘1989 mbere gato y’uko urukuta rwaranze amateka rw‘ i Berlini rusenyuka urugendo nyobokamana rwakorewe muri Espanye ahitwa Saint-Jacques - de -Compostelle. None igihe umugabane w’Uburayi ukeneye kongera gushora imizi mu bukristu, tuzahurira i Madride dufite insanganyamatsiko igira iti  « Mushore imizi muri Kristu kandi mube ariwe mwishingikirizaho mukomejwe n’ukwemera » (Kol 2,7). Mbararikiye icyo gikorwa gifitiye akamaro Kiliziya mu Burayi na Kiliziya y’isi yose. Nifuzako urubyiruko rwose, rwaza muri iryo huriro, baba abo dusangiye ukwemera muri Yezu Kristu, baba abaseta ibirenge, abashidikanya kumwemera n’abatamwera. Iryo huriro rishobora kubabera imbarutso yo gufata umurongo uhamye w’ubuzima bwabo: guhura na Nyagasani wazutse kandi uriho, bakabona n’urukundo afitiye buri wese muri twe.


1 .Ku isoko y’ibyo murangamiye


Mu bihe byose ndetse no ku gihe cyacu, urubyiruko rwinshi rwifuza ko imibanire y’abantu yarangwa n’ukuri n’ubufatanye. Benshi bifuza kugira umubano w’ukuri ushingiye ku bucuti, kubona urukundo rw’ukuri, gushinga umuryango wunze ubumwe, kuba batekanye mu mibereho yabo, kugira umutuzo uhamye bituma bizera ajo hazaza hakeye kandi hashimishije.


Iyo ntekereje nari muto , mbona ko umutuzo n’umutekano ataribyo bihangayikishije cyane urubyiruko. N’ubwo kugira umurimo watuma umuntu abaho nt mpungenge ari ikibazo gikomeye kandi cyihutirwa ntibikuraho ko urubyiruko ruri mu kigero cyo guhitamo icyerekezo-shingiro cy’ubuzima.


Iyo ntekereje igihe nari muto nibuka ko twifuzaga kutaguma mu mibereho isanzwe. Twifuzaga ibikomeye kandi bishya. Twifuzaga kugira ubuzima bwisumbuye kandi bwiza.Ibi bikaba byaraterwaga n’uko ibintu byaribimeze.


Mu gihe cy’ubutegetsi bw’igitugu no mu ntambara (Intambara ya Kabiri y’Isi), twapfukiranwe n’ubutegetsi bwariho. Tukifuza gusohoka muri iyo mfutanwa twarimo ngo dukoreshe ubushobozi bwa muntu. Ndahamya ko ubwo bushake bwo kwifuza kuva mu bisanzwe bubaho mu bihe byose. Kwifuza ibitandukanye n’ibimenyerewe mu buzima bwa buri munsi ugaharanira ibyisumbuyeho koko biri mu biranga abakiri bato. Tuvuge ko ari inzozi zeyuka iyo tubaye bakuru? Oya. ahubwo umuntu yaremewe ibyisumbuye bidafite iherezo. Ibisigaye ntibihagije, ntibimara ipfa. Mutagatifu Agustini yabivuze ukuri: ati « Umutima wacu ntiwatuza utaratura muri wowe ». Guharanira imibereho isumba isanzwe ni ikimenyetso cy’uko Imana yaturemye ko twifitemo ishusho yayo. Imana ni ubuzima ni nayo mpamvu ibiremwa byose yaremye biharanira kubaho. Kuburyo bwihariye kandi budasanzwe umuntu uremye mu ishusho y’Imana kandi usa nayo, akararikira urukundo, ibyishimo n’amahoro.


Turumva neza ko ari ugucurika ibintu gushaka kwigizayo Imana ngo ubesheho umuntu! Imana ni isoko y’ubuzima, kuyigizayo ni ukujya kure y’isoko bikaba kwibuza umudendezo n’ibyishimo: « Ikiremwa kidafite umuremyi kirapfa » (Vat.II Const. Gaudium et Spes, 36).

Umuco w’iki gihe mu nce zimwe na zimwe z’isi, cyane cyane mu bihugu byateye imbere, ushaka kwigizayo Imana cyangwa gufata ukwemera nk’umwihariko w’umuntu, ko kudakenewe mu mibereho rusange y’abantu. Mu gihe indangaciro ziremye umuryango w’abantu zikomoka ku Ivanjili – nk’agaciro k’ikiremwamuntu, ubufatanye, umurimo n’umuryango- haragaragara guhigika Imana, twakwita ubuhumyi kuko guhakana ubukristu n’ubukungu bukomoka k’ukwemera bishobora gutuma dutakaza indangamimerere shingiro yacu.


Niyo mpamvu , nshuti rubyiruko, mbahamagarira gukaza umurego mu nzira murimo yo kwemera Imana, Se wa Nyagasani Yezu Kristu. Nimwe Kiliziya y’ejo ni mwe muryango w’abantu w’ejo. Nk’uko Pawulo yabyandikiye abakristu bo mu mujyi wa Kolosi kugira ifatizo n’ishingiro nibyo bigize ubuzima bukomeye. Ibyo bikarushaho kumvikana kuri iki gihe. Aho urubyiruko rwinshi rudafite irebero rihamye ngo ruteganye imibereho yarwo, bituma ruhangayika. Gukerensa ibintu kwateye, gutuma tubifata kimwe twibwirako nta cyifitemo ukuri gushyitse , ko ntacyaba irebero. Uko gukerensa ntikuduha ubwigenge bw’ukuri ahubwo turajahagurika, tugacika intege, tugahebera urwaje,tugapfa kuyabira ibyo tubonye.

Mwebwe rero rubyiruko mufite uburenganzira bwo guhabwa n’ababanjirije ibyo mwareberaho bigaragara kugira ngo muhitemo kandi mutegure ubuzima bwanyu nk’uko igiti kigikura gikenera ko bagitegera igihe gihagije, kugira ngo gishinge imizi kandi gikomere kizabashe gutanga imbuto.

 

2.Mushore imizi muri Kristu kandi mube ariwe mwishingikirizaho


Kugira ngo ngaragaze agaciro gakomeye ko kwemera Imana mu buzima bwacu, ndashaka kwibanda ku mvugo eshatu Mutagatifu Pawulo yakoresheje muri uyu murongo « Mushore imizi muri Kristu kandi mube ariwe mwishingikirizaho mukomejwe n’ukwemera ». Dushobora kubonamo ibigereranyo bitatu: « Mushore imizi » biributsa igiti n’imizi igitunze; « Mwishingikirizaho » birerekeza ku kubaka inzu ; hanyuma  « Mukomejwe » bikajyana no gukura kw’imbaraga za roho n’iz’umubiri. Ibi bigereranyo birumvikana. Mbere yo kubisobanura nibutse ko mu Kigereki bishaka kuvuga ko Kristu ubwe afata iya mbere mu gutuma abemera bashinga imizi, bamwubakiraho kandi bagakomera.


Ikigereranyo cya mbere ni iki igiti gifatishijwe mu butaka n’imizi yacyo, igikomeza kandi igitunga. Nta mizi, igiti cyatwarwa n’umuyaga cyikagwa. None imizi yacu ni iyihe? Birumvikana hari ababyeyi bacu, umuryango wacu, n’umuco w’igihugu cyacu bifite umwanya ukomeye mu bituranga.


Bibiliya igaragaza n’ikindi. Umuhanuzi Yeremiya agira ati « arahirwa umuntu wiringira Uhoraho akamubera ikiramiro. Ameze nk’igiti giteye ku nkombe y’amazi, kigashora imizi yacyo ku nkengero y’umugezi. Ntacyo cyumva iyo icyokere kije, amababi yacyo ahora atohagiye mu gihe cy’amapfa. Ntakigikangaranya kandi ntigihwema kwera imbuto » (Yer 17,7-8).

Gushora imizi, ku bwa Yeremiya ni ukwiringira Imana, mu kwemera. Mu Mana niho dukomora ubuzima . Nta Mana, ntitwabaho by’ukuri. « Imana yaduhaye ubugingo buhoraho, kandi ubwo bugingo buri mu mwana wayo » (1Yh 5,11). Yezu na we yigaragaza nk’ubuzima bwacu ( Reba Yh14,6). Niyo mpamvu ukwemera kw’abakristu kudashingiye gusa ku mahame, ahubwo mbere na mbere ni ukugirana umushyikirano bwite na Yezu Kristu. Ni uguhura n’Umwana w’Imana uha ubuzima bwacu imbaraga nshya. Iyo tugiranye umushyikirano bwite na We, Kristu aduhishurira abo turibo, kandi muri ubwo bucuti, ubuzima bugakura bugasagamba.


Mu buto bwacu , hari igihe buri wese yibaza ibi bibazo: ubuzima bwanjye buvuze iki? Bugamije iki? Ni ikihe cyerekezo nshaka kubuha? Ni intera y’ibanze ishobora guhungabanya roho yacu bikaba byamara igihe. Twibaza umurimo twatangira, uko twabana n’abandi , imishyikirano twagirana n’abandi ijyanye n’uko twiyumva? N’ibindi. Nanone nongera gutekereza ubuto bwanjye. Ibyo aribyo byose niyumvagamo ko Nyagasani anyifuza nk’umupadiri. Nyuma y’intambara, mu iseminari no muri kaminuza ndimo mbyitegura nagombye kongera kunoza uwo mugambi. Naribazaga nti:  « Iyi koko ni inzira yanjye ? Koko nicyo Imana inshakaho? Nzashobora kuyibera indahemuka no kuyikorera ntiziganya? » Gufata icyemezo nk’icyo biravunanye . Uretse ko nta kundi byagenda. Nyuma nagize ukutajijinganya ndibwira nti «Nibyo Nyagasani arankeneye, azampa imbaraga» . Mu kumwumva no kugendana na We mba koko uwo ndiwe. Icyangombwa si ukugera kubyo nifuza ahubwo ni ukugera ku ugushaka kwe. Bityo nkaba uwo ndiwe.Ubuzima bukamera uko bwagombye kumera.

Nk’uko igiti kigira imizi ituma gifata mu butaka kigakomera, niko inzu ihagarara igakomera bitewe na fondasiyo yayo.Mu kwemera twubakiye kuri Kristu( Reba Kol 2,6) nk’uko inzu iba yubakiye ku ishingiro ryayo. Mu mateka y’ubukristu dufite ingero nyinshi z’abatagatifu bashingiye ubuzima bwabo ku Ijambo ry’Imana . Uw’ibanze ni Abrahamu. Umukurambere wacu mu kwemera yumvise Imana yamusabaga kuva mu muryango we akerekeza mu gihugu atazi. « Nuko Abrahamu yemera Imana maze aba intungane» (Yak 2,23). Kubakira kuri Kristu ni uguha igisubizo cyiza Imana iduhamagara, tuyigirira icyizere kandi dushyira mu ngiro Ijambo ryayo. Yezu ubwe yihanangirije abigishwa be agira ati: «Ni iki gituma mumpamagara ngo Mwigisha ! Mwigisha kandi mudakora ibyo mbabwira ? » (Lk 6,46). Yifashishije ikigereranyo cyo kubaka yongeraho ati: «Umuntu wese ungana, akumva amagambo yanjye, kandi akayakurikiza, reka mbereke uwo namugereranya. Ameze nk’umuntu wubatse inzu, agacukura akageza ku rutare, akarugerekaho amabuye y’ishingiro. Umwuzure uteye, umuvu wiroha kuri iyo nzu, ariko ntiyanyeganyega, kuko yari yubatse neza. Naho rero uwumva amagambo yanjye ntayakurikize, ameze nk’umuntu wubatse inzu ku musenyi , ashinga imiganda yayo ahadakomeye. Umuvu uyiroshyeho, ihera ko itemba, maze aho yari iri hahinduka itongo! » (Lk 6,47-49).


Rubyiruko nkunda, mwubake inzu yanyu ku rutare nk’uriya wacukuye akageza ahakomeye. Namwe nimuharanire iminsi yose gukurikira Ijambo rya Kristu. Mumwumve nk’inshuti y’ukuri mugendana mu buzima: Nababa iruhande muzashobora nguhangarana ishyaka n’icyizere ibibazo, ingorane n’ibibaca intege. Akenshi muhabwa inzira zoroshye zo kubinyuramo ariko mwebwe ubwanyu mubonako bibayobya kuko bidatanga ibyishimo n’umutuzo. Ijambo ry’Imana ryonyine niryo ritwereka inzira y’ukuri; ukwemera twahawe konyine niko kumurikira amayira yacu. Mwakire neza iyo mpano y’Imana mukesha umuryango muvukamo. Mwiyemeze gukurikira Imana ibahamagara muzi icyo mukora, mube abantu bakuru mu kwemera.


Ntimukizere abababwirako mudakeneye abandi kugira ngo mutegure ubuzima bwanyu. Ahubwo nimwifashishe ukwemera kw’abanyu, mwifashishe ukwemera kwa Kiliziya, mushimire Imana yabahaye uko kwemera!


3.Mukomezwe n’ukwemera


«Mushore imizi muri Kristu kandi mube ariwe mwishingikirizaho mukomejwe n’ukwemera» (Kol 2,7). Ibaruwa yavuyemo uyu murongo yanditswe na Mutagatifu Pawulo ashaka gutanga igisubizo cyari gikenewe n’abakristu bo mu mujyi wa Kolosi. Uwo muryango wari ubangamiwe n’imigenzereze yakuraga mu muco w’icyo gihe, imigenzereze yayobyaga abemera Ivanjili.Rubyiruko nkunda, imico y’iki gihe , hari byinshi ihuriraho n’umuco w’Abanyakolosi b’icyo gihe. Hari imigenzereze ishaka kwigizayo Imana mu buzima bw’abantu ku giti cyabo cyangwa muri rusange. Imigenzereze ishaka gutegura no gukora paradizo itagira Imana. Nyamara byaragaragaye ko isi itagira Imana ari «umuriro utazima» ugizwe n’ukwikunda, amacakubiri mu miryango, urwangano hagati y‘umuntu n’undi  no hagati y’abantu benshi, kubura urukundo, ibyishimo n’ukwizera. Ahubwo aho abantu ku giti cyabo cyangwa muri rusange babaho biyereka Imana, bayishengerera mu kuri, kandi bumva ijwi ryayo haganza umuco w’urukundo. Buri wese akubahwa mu gaciro ke, hakaganza ugushyira hamwe n’ibyiza bigukomokaho. Hari na none abakristu batwarwa n’iyo migenzereze yigizayo Imana cyangwa bakigarurirwa n’abatemera Yezu Kristu. Abandi n’ubwo batayoboka iyo migenzereze baretse ukwemera kwabo kurakonja; byanze bikunze ibyo bigira ingaruka mbi ku myitwarire y’abantu.


Ku bavandimwe bigaruriwe n’ibyo bitekerezo binyuranije n’Ivanjili, Pawulo intumwa aributsa ubushobozi bwa Kristu wapfuye akazuka. Iryo yobera ni ryo ubuzima bwacu bushingiyeho rikaba n’izingiro ry’ukwemera kw’abakristu. Indi mitekerereze itazi iryo yobera irifata nk’ubusazi (1Kor 1,23) bigaragaza ko ifite aho igarukira mu gusubiza ibibazo bikomeye muntu adahwema kwibaza. Niyo mpamvu nanjye nk’umusimbura wa Petero Intumwa, nifuza kubakomeza mu kwemera ( Reba Lk 22,32). Twemere dukomeje ko Yezu yitanze ku musaraba ngo aduhe urukundo. Mu bubabare bwe yikoreye imibabaro yacu, yirengeye ibyaha byacu, aturonkera imbabazi atwunga n’Imana Data, tugira uburenganzira ku bugingo bw’iteka. Ni uko twabohowe icyari kitubangamiye gusumbya ibindi mu buzima bwacu: ubucakara bw‘icyaha. Bityo dushobora gukunda abantu bose kugera no kubanzi bacu no gusangiza urwo rukundo abakene gusumbya abandi n’abahuye n’ingorane bo mu bavandimwe bacu.


Rubyiruko nkunda, Umusaraba ukunda kudutera ubwoba, kuko usa nk’aho wigizayo ubuzima. Mu byukuri ibyo sibyo! Ahubwo umusaraba ni «Yego» y’Imana ibwira muntu; ukaba igisobanuro cy’urukundo rurenze n’isoko ivubuka ubuzima. Koko rero mu mutima wa Yezu wakingujwe icumu ku Musaraba havubutsemo ubwo buzima bw’Imana, buteganirijwe uwo ariwe wese wemera kurangamira Uwabambwe. Icyo nabasaba ni ukwakira Umusaraba wa Yezu, wo kimenyetso cy’urukundo rw’Imana; mukawakira nk’isoko y’ubuzima bushya. Nta mukiro wundi twabona, utari muri Kristu wapfuye akazuka! Ni we wenyine ushobora gukiza isi ikibi, hakaganza Ingoma y’ubutabera, y’amahoro n’urukundo turarikiye twese.

 

4.Kwemera Yezu tutamubona


Mu Ivanjili basobanura iby’ukwemera kwa Mutagatifu Tomasi Intumwa mu kwakira, iyobera ry’Umusaraba n’iry’Izuka rya Kristu.Tomasi ni umwe mu ntumwa cumi n’ebyiri. Yakurikiye Yezu, amwibonera n’amaso ye akiza abarwayi,akora n’ibitangaza. Yumvise amagambo ye. Imbere y’urupfu yumvise atakaye. Ku mugoroba wa Pasika Nyagasani yabonekeye abigishwa be, ariko Tomasi ntiyari ahari. Abwiwe ko Yezu ari muzima kandi ko yiyerekanye yagize ati «Nintabona mu biganza bye umwenge w’imisimari, kandi nintashyira urutoki rwanjye mu mwenge w’imisimari, n’ikiganza cyanjye mu rubavu rwe sinzemera! » (Yh 20,25)


Natwe twifuza gushobora kubona Yezu, gushobora kuvugana na We, kumva neza ko ahari. Ku bantu benshi kuri iki gihe, kugera kuri Yezu bisigaye bigoye. Tubona amashusho ya Yezu menshi akwirakwizwa,bakibwira ko ari aya gihanga kandi amwambura ubuhangage bwe, n’ubwema yihariye. Niyo mpamvu mu gihe cy‘imyaka myinshi nsesengura kandi nzirikana, nigizemo igitekerezo cyo kwerekana mu nyandiko uko nahuye na Yezu: kugira ngo ngerageze gufasha mu kubona no kumva Nyagasani, We Imana Data yatwigaragarijemo ngo tuyimenye.


Nuko rero nyuma y’iminsi umunani Yezu ubwe yongera kubonekera abigishwa , abwira Tomasi ati «Shyira urutoki rwawe hano, urebe n’ibiganza byanjye; zana n’ikiganza cyawe ugishyire mu rubavu rwanjye, maze ureke kuba umuhakanyi ahubwo ube umwemezi». (Yh 20,26-27). Natwe dushobora guhura na Yezu ku buryo bwumvikana, tukumva ibimenyetso by’ububabare bwe n’ikiganza cyacu, tukumva ibimenyetso by’urukundo rwe: mu Masakaramentu by’umwihariko aratwegera akatwiha.


Rubyiruko nkunda, twige «kubona» no «guhura» na Yezu mu Ukarisitiya aho ari akaba hafi yacu kugeza ubwo aba ikiribwa mu nzira yacu;mu Isakaramentu ry’Imbabazi aho Nyagasani atugaragariza impuhwe ze atubabarira. Mumenye kandi mukorere Yezu uri mu bakene, mu barwayi no mu bavandimwe bari mu ngorane kandi bakeneye gufashwa.


Mutangire kandi mwimenyereze umushyikirano bwite na Yezu Kristu, mu kwemera. Mumumenyere mu gusoma Ivanjili na Gatigisimu ya Kiliziya Gatolika. Mwinjire mu mushyikirano na We mu isengesho, mumugirire icyizere: ntazigera abatenguha! « Mbere na mbere ukwemera ni ubuyoboke bwite bw’umuntu ku Mana; kukaba na none kandi ku buryo bw’indatana, kwakira ku bushake ukuri kose Imana yaduhishuriye» (Gatigisimu ya Kiliziya Gatolika, 150). Nibwo muzagira ukwemera gushyitse, gukomeye, kudashingiye gusa ku marangamutima cyangwa ku byo mwibuka ku buryo budafututse mwigeze kwiga muri gatigisimu mukiri abana. Muzamenya Imana kandi mubeshweho nayo koko, nka Tomasi intumwa iyo agaragaza ukwemera afitiye Yezu yatura n’imbaraga ati «Nyagasani Mana yanjye! »


5.Dufashwe n’ukwemera kwa Kiliziya kugira ngo tube abahamya   ba Yezu


Ako kanya Yezu aratangara ati «Wemejwe n’uko umbonye. Hahirwa abemera batabanje kwirebera»(Yh 20,28). Yatekerezaga Kiliziya yubakiye ku kwemera kw’abahamya babyiboneye aribo Intumwa.Tugasobanukirwa ko ukwemera kwacu bwite muri Kristu, gukomoka ku mushyikirano udasimburwa tugirana na We, kandi gufitanye isano n’ukwemera kwa Kiliziya: Ntituri abemera bitaruye , ahubwo ku bwa Batisimu tugize uwo muryango mugari, kandi ukwemera Kiliziya yamamaza niko guha ireme ukwemera kwacu bwite. Indangakwemera turirimba mu Misa yo ku cyumweru iturinda nyine kutayoba twemera Imana itari iyo Yezu yaduhishuriye: «Uwemera wese ni urugingo rw’uruhererekane rurerure rw’abemera. Sinshobora kwemera ntafashijwe n’ukwemera kw’abandi, kandi nanjye mu kwemera kwanjye nkagira uruhare mu gushyigikira ukwemera» (Gatigisimu ya Kiliziya Gatolika, 160). Tujye duhora dushimira Nyagasani waduhaye Kiliziya. Ituma dutera imbere mu kwemera kuduha ubuzima bw’ukuri nta bwoba. (Yh 20,31).


Mu mateka ya Kiliziya, abatagatifu n’abahowe Imana bavomye mu nsi y’Umusaraba wuje ikuzo wa Kristu, imbaraga zo kuba indahemuka ku Mana kugera ku kwitanga. Mu kwemera babonye imbaraga zo gutsinda intege nke zabo no kurenga imbogamizi zose. Kuko nk’uko Yohani intumwa abivuga «Ni nde utsinda isi atari uwemera ko Yezu ari Umwana w’Imana? » (1Yh5,5). Intsinzi ikomoka ku kwemera ni iy’urukundo. Abakristu benshi bakomeje guhamya imbaraga z’ukwemera zigaragariza mu rukundo: babaye abubatsi b’amahoro, baharanira ubutabera, baharanira kubaka isi ibereye umuntu, uko Imana iyishaka .


Bitanze mu nzego zinyuranye z’imibereho y’ abantu, mu bushobozi n’ubumenyi baharanira ku buryo bugaragara ibyiza bya bose. Urukundo rukomoka ku kwemera rwatumye baba abahamya ku buryo bufatika mu bikorwa no mu magambo: Kristu si uwo kwiharira, ni ubukungu buhenze tugomba gusangiza abandi. Mu gihe cy’ikusanyabukungu, nimube abahamya b’ukwizera kwa gikristu mu isi hose: hari benshi bakeneye uko kwizera! Imbere y’imva y’inshuti ye Lazaro, wari umaze iminsi ine apfuye , mbere y’uko amuzura, Yezu yabwiye Marita ati«Niwizera urabona ikuzo ry’Imana» (Yh 11,40). Namwe niba mwemera, mubaho muhamya ukwemera kwanyu mu buzima bwanyu bwa buri munsi, muzaba ibikoresho byo gutuma urundi rubyiruko nkamwe rwongera kubona icyerekezo n’ibyishimo byo kubaho bikomoka ku guhura naYezu.

 

6.Twerekeze i Madride mu Munsi Mpuzamahanga


Rubyiruko nkunda, nongeye kubatumira kuzaza mu Munsi Mpuzamahanga w’Urubyiruko i Madride. N’ibyishimo bimvuye ku mutima ndabategereje buri wese ku giti cye: Kristu arashaka kubakomeza mu kwemera muri Kiliziya. Guhitamo kwemera Kristu no kumukurikira ntibyoroshye. Bibangamirwa kenshi n’ubuhemu bwacu bwite. Bikabangamirwa kandi n’andi majwi menshi atwereka inzira zoroshye. Mwicika intege , nimushake ibibafasha mu muryango w’abakristu, muri Kiliziya! Muri uyu mwaka mwitegure mushimitse iryo huriro rya Madride hamwe n’abepiskopi , abasaseridoti , abashinzwe iyogezwabutumwa ry’urubyiruko mu madiyosezi, amaparuwasi, amatsinda n’imiryango. Iryo huriro rizaba ryiza bitewe ahanini n’uko muzaryitegura kuri roho, mu isengesho, mu kumvira hamwe Ijambo ry’Imana no gushyigikirana.

Rubyiruko nkunda, Kiliziya irabizeye! Ikeneye ukwemera kwanyu kuzima, urukundo rwanyu rubeshaho n’ishyaka ry’ukwizera kwanyu. Muzana amaraso mashya muri Kiliziya, muyisubiza itoto mukayiha imbaraga nshya . Ni yo mpamvu Iminsi Mpuzamahanga y’Urubyiruko ari ingabire kuri mwe no ku Muryango w’Imana. Kiliziya muri Espagne iritegurana ishyaka kubakira no gusangira namwe ibyishimo bikomoka ku kwemera. Ndashimira amadiyosezi, amaparuwasi, ahantu hakorerwa ingendo ntagatifu hihariye, imiryango y’abihayimana, amatsinda n’imiryango yitangira gutegura iryo huriro. Nta kabuza Nyagasani azabaha umugisha.


Bikira Mariya abaherekeze mu nzira y’imyiteguro! Igihe atumweho Malayika yakiranye ukwemera Ijambo ry’Imana. Yemerana ukwemera igikorwa Imana yuzurizaga muri we. Avuga ngo “Yego”; “Yego” ye yagizwe urukundo rukomeye rwatumye yiyegurira Imana wese. Nasabire buri wese muri mwe kugira ngo muri uwo Munsi Mpuzamahanga muzakure mu kwemera no mu rukundo! Mbijeje ko mbazirikana nk’umubyeyi mu isengesho kandi mbikuye ku mutima mbahaye umugisha.


Vatikani 6 Kanama 2010 , Ku munsi duhimbaza Yezu yihindura ukundi.

 

                                     BENEDICTUS PP. XVI

 

Traduction CEPJ


24 Kanama 2014: Icyumweru cya 21 mu byumweru bisanzwe

         AMASOMO:
Iz 22, 19-23abr /> Rom 11, 33-36
 Mt 16, 13-20


«Wowe uri Kristu, Umwana w'Imana Nzima. »